Manual de busca de Iluminuras

As bases de datos deste proxecto almacenan diferentes tipos de información que podemos dividir entre «elementos» e «atributos». Os primeiros corresponden a aquilo que podemos procurar e que, por tanto, o seu propio buscador: Cantigas de Santa María, iluminuras das CSM, lugares das CSM, fontes das CSM, lugares do itinerario afonsino, etc. Cada un destes chamados «elementos» é complementado por diferentes atributos, algúns deles (como os «lugares») compartidos entre varias.

Así, por exemplo, o elemento «CSM 10» recibe a información «Loor» do atributo «Tipo CSM» ou «Rosa das rosas e Fror das frores» de «Incipit». Neste exemplo, a devandita CSM non recibe nada do atributo «Lugares», xa que esta cantiga non menciona ningún no seu texto.

Emprego xeral dos formularios da web

Funcionamento do formulario de buscas

A base de datos funciona cun sistema de procura con resultados automáticos, xa que se mostran mentres se escribe. Deste modo, tanto cada unha das caixas de busca, como os resultados finais, son actualizados a medida que se vai realizando a consulta.

Nas caixas de busca aparece un menú despregábel cada vez que se fai clic nel. Ao escribir, as posibilidades deste menú van axustándose ao texto introducido. Á dereita de cada opción, entre parénteses, observarase o número de resultados que se poderían obter facendo clic nese elemento. Debido a que a pesquisa é actualizada automaticamente, os posíbeis resultados de cada caixa tamén variarán. Así, por exemplo, se en «Tipo de CSM» marcamos «Loor», o apartado dedicado a escoller directamente o número da cantiga soamente mostrará aquelas acabadas en 0.

En case todas as caixas é posíbel seleccionar varias opcións á vez. Para facelo, despois de escoller a primeira, simplemente débese repetir o proceso para a segunda. Os elementos funcionan a través do criterio «e» (and, en inglés). É dicir, que se se seleccionan 2 atributos, aparecerán os resultados que coincidan con ambos, non con un ou con outro. Como consecuencia disto, a lista de resultados será limitada se optamos por seleccionar varias opcións de busca.

Os resultados que devolverá o noso filtrado serán actualizados automaticamente e variarán cada vez que se introduza un novo valor. É por isto que non hai un botón para «buscar» e soamente apareza ao final aquel que permite «reiniciar» a pesquisa. Clicando neste estaremos eliminando todos os valores introducidos nas caixas e facendo que os resultados mostren todos os resultados arquivados na base de datos.

Como procurar varios atributos á vez

Usando un equipo de escritorio pódese buscar a través de varios atributos á vez facendo clic no primeiro e máis tarde no segundo. Entre un e outro decorrerán os segundos que os resultados tarden en actualizarse. Para eliminar calquera das opcións seleccionadas débese clicar enriba do × situado á dereita de cada valor.

En xeral, pódese seleccionar tantos atributos e valores como se desexe, aínda que tendo en conta o explicado anteriormente, non sempre é recomendábel, xa que axustar demasiado os parámetros da pesquisa podería provocar que non se obtivesen resultados.

En caso de acceder a través de dispositivos móbiles, a visualización pode variar segundo o sistema e o navegador, aínda que habitualmente logo de facer clic no campo de busca aparecerá unha xanela emerxente onde poderemos seleccionar os valores desexados.

A procura múltiple dentro dun mesmo campo non sempre está dispoñíbel por criterios lóxicos.

Atributos xerárquicos

Algúns atributos, como os «Lugares» son xerárquicos, é dicir, que pertencen a outros superiores. Nos formularios de procura, pódese seleccionar o elemento superior na xerarquía e, deste modo, indicar que se desexa procurar en todos os niveis inferiores. Así, ao seleccionar España, obteranse os resultados de Toledo, Sevilla ou toda a actual Castela e León, por exemplo.

Atributos das iluminuras

Manuscritos, cantigas, tipos e folios

Posibilidade de procurar entre os manuscritos do Códice das Historias, as Cantigas de Santa María, a súa tipoloxía (tendo en conta aquelas iluminadas a dobre páxina) ou dirixirse directamente ao folio desexado.

Estado da iluminura

Grazas a este atributo podemos distinguir entre aquelas iluminuras completamente acabadas e con todos os elementos necesarios para entendelas, daquelas incompletas ou cuxa lectura resulta máis complicada. Non se clasifican as iluminuras de cadros que estean baleiros e sen marcas.

As opcións posíbeis son: Acabada e en bo estado, Acabada e en estado aceptábel (existen manchas ou problemas que non dificultan a lectura da imaxe), Acabada e en mal estado (hai problemas para diferenciar partes da iluminura), Inacabada (hai partes de importancia sen realizar), Perdida e Só o cadro.

Trazas iluminura

Características xerais da iluminura que teñen que ver coa contorna no que están os personaxes ou co cadro do folio no que se inclúe a viñeta.

Elementos visíbeis

Persoas, seres ou obxectos representados na iluminura.

Localizacións

Lugares visíbeis na iluminura. Esta opción pode devolver algún erro, xa que é necesario redefinir os criterios polos que dicimos que un lugar está na iluminura; é dicir, se debemos indicalo a partir da mención no texto (como na base de datos de Lugares CSM) ou só se na representación hai elementos que permiten unha diferenciación clara, como o acueduto de Segovia na CSM 107.

Posición

Lado (esquerdo ou dereito) no que está a iluminura dentro da cuadrícula.

Titulus

Atributo que indica se hai texto no título da viñeta.

Nomenclatura

Para referirnos ás imaxes dos manuscritos iluminados empregaremos o termo «iluminura», en lugar de «miniatura»¹. Como no apartado «Cantigas», a enumeración de cada CSM será acorde á proposta de Mettmann².

Fernández Fernández, Laura, “Manuscritos iluminados: artífices, espacios y contextos productivos” en Avenoza, Gemma, Laura Fernández Fernádez e M. Lourdes Soriano Robles (eds.), La producción del libro en la Edad Media. Una visión interdisciplinar, 131-206, 2019.
Mettmann, Walter (ed.), Cantigas de Santa María. Tomo I: Cantigas 1 a 100; Tomo II: Cantigas 101 a 260; Tomo III: Cantigas 261 a 427. Madrid: Castalia, 1986.

Usaremos as letras do alfabeto galego para identificar cada viñeta das iluminuras, polo que non haberá «j» nin «k». Estas serán sumadas ao número (de 3 caracteres) de cada CSM.

Na imaxe anexa observamos un exemplo de numeración para unha cantiga iluminada a dobre páxina.

Outros

Comunicar un erro

Se encontrou algo que considera erróneo (datos, erros técnicos ou problemas de deseño) ou ten algún tipo de dúbida, considere poñerse en contacto a través do enderezo de correo electrónico .

Erros coñecidos

Mantemos un rexistro dos erros comunicados e sen solucionar que pode consultar aquí.

Os lugaresDas cantigas

Os lugaresdas cantigas